वयाच्या ६१ व्या टप्प्यावर मिळवली नवी ओळख

टाकळी हाजी |( साहेबराव लोखंडे)

शिक्षणासाठी वयाची अट नसते, हे सत्य सिद्ध करत शक्ती प्रिंटर्सचे मालक आणि भाजप शिरूर तालुका संपर्कप्रमुख बाबुरावकाका पाचंगे यांनी वयाच्या ६१ व्या वर्षी एल.एल.बी. (वकिली) परीक्षा उत्तीर्ण करून एक अनुकरणीय आदर्श निर्माण केला आहे. त्यांच्या या उल्लेखनीय यशाबद्दल शिरूर शहरासह संपूर्ण तालुक्यातून त्यांच्यावर अभिनंदनाचा वर्षाव होत आहे.

पाचंगे यांचा जीवनप्रवास संघर्षमय असला तरीही त्यांनी कधीही शॉर्टकटचा मार्ग स्वीकारला नाही. शिक्षणाची ओढ लहानपणापासून असली तरी कौटुंबिक जबाबदाऱ्यांमुळे त्यांचे शिक्षण अपूर्ण राहिले. मात्र त्यांनी शिक्षणाचं स्वप्न आयुष्याच्या अखेरच्या टप्प्यावर पूर्ण करण्याचा निर्धार केला आणि अखेर “ॲड. बाबुरावकाका पाचंगे” म्हणून ओळख निर्माण केली.

विशेष म्हणजे, एल.एल.बी. परीक्षेचा निकाल त्यांच्या वाढदिवशीच लागला, ज्यामुळे वाढदिवसाचा आनंद द्विगुणीत झाला. आपल्या यशावर प्रतिक्रिया देताना पाचंगे म्हणाले, “मी माझ्या वकिलीच्या माध्यमातून समाजातील गरजू, वंचित आणि गरीब लोकांसाठी विनामूल्य कायदेशीर मदत देणार आहे. तसेच, मी ज्या पक्षात कार्यरत आहे त्या भारतीय जनता पक्षाच्या कार्यकर्त्यांसाठी देखील मी कायम उपलब्ध राहीन.”

पाचंगे हे केवळ यशस्वी व्यावसायिक नाहीत, तर एक सामाजिक भान असलेले, निःस्वार्थ कार्य करणारे कार्यकर्ते म्हणूनही ओळखले जातात. त्यांचा सौम्य, स्पष्टवक्ता स्वभाव आणि सेवाभावामुळे त्यांना शिरूर तालुक्यात सन्मानाने पाहिले जाते.

प्रेरणादायी उदाहरण
बाबुरावकाका पाचंगे यांचे हे यश केवळ वैयक्तिक न राहता, ते ग्रामीण भागातील, मध्यमवर्गीय तसेच संघर्ष करणाऱ्या प्रत्येकासाठी एक प्रेरणास्त्रोत ठरले आहे. त्यांनी सिद्ध केले की —

• वय हे फक्त एक संख्या आहे
• जिद्द, चिकाटी आणि ध्येयावर निष्ठा असेल तर काहीही अशक्य नाही
• शिक्षण आणि समाजसेवा यासाठी उशीर कधीच होत नाही

समाजाच्या उन्नतीसाठी आपले ज्ञान आणि पात्रता वापरण्याची ऍडव्होकेट बाबुराव पाचंगे काका यांची भावना खरोखरच वंदनीय आहे. त्यांच्या पुढील वाटचालीस हार्दिक शुभेच्छा!