शिरूर | राष्ट्रवादी काँग्रेस पक्षाचे अध्यक्ष तथा राज्याचे उपमुख्यमंत्री अजितदादा पवार यांच्या निधनाची दुःखद बातमी समजताच टाकळी हाजी–कवठे येमाई जिल्हा परिषद गटाचे राष्ट्रवादी काँग्रेस पक्षाचे उमेदवार दामूशेठ घोडे यांना शोक अनावर झाला.
अजितदादा पवार हे राष्ट्रवादी काँग्रेस पक्षाचे आधारस्तंभ, मार्गदर्शक नेतृत्व आणि हजारो कार्यकर्त्यांचे प्रेरणास्थान होते. त्यांच्या निधनाने राज्याच्या राजकारणात तसेच राष्ट्रवादी काँग्रेस पक्षात न भरून येणारी मोठी पोकळी निर्माण झाली आहे, अशा भावना घोडे यांनी व्यक्त केल्या.
या दुःखद प्रसंगी दामूशेठ घोडे यांनी अजितदादा पवार यांना भावपूर्ण श्रद्धांजली अर्पण केली. तसेच त्यांच्या कुटुंबीयांप्रती आणि पक्षातील सर्व पदाधिकारी व कार्यकर्त्यांप्रती त्यांनी मनःपूर्वक शोकसंवेदना व्यक्त केल्या.
अजितदादा पवार : महाराष्ट्राच्या राजकारणातील प्रभावी नेतृत्व
अजितदादा पवार हे महाराष्ट्राच्या राजकारणातील एक अनुभवी, अभ्यासू आणि प्रभावी नेते म्हणून ओळखले जात होते. प्रशासनावर मजबूत पकड, निर्णयक्षम नेतृत्व आणि विकासाभिमुख दृष्टिकोन ही त्यांची ओळख होती.
राज्याचे माजी मुख्यमंत्री आणि ज्येष्ठ नेते शरदचंद्रजी पवार यांचे पुतणे असलेल्या अजित पवार यांनी विद्यार्थी दशेपासूनच राजकारणात सक्रिय सहभाग घेतला. बारामती तालुक्यातून त्यांनी आपल्या राजकीय कारकिर्दीची सुरुवात केली. अनेक वेळा आमदार म्हणून निवडून येत त्यांनी जनतेचा भक्कम विश्वास संपादन केला.उपमुख्यमंत्री, जलसंपदा मंत्री, वित्त मंत्री अशा विविध महत्त्वाच्या जबाबदाऱ्या त्यांनी यशस्वीपणे पार पाडल्या. सिंचन प्रकल्प, जलसंपदा विकास, शेतकरी हिताचे निर्णय आणि आर्थिक शिस्त यासाठी त्यांचे योगदान राज्यभर उल्लेखनीय ठरले.
थेट, स्पष्ट आणि परखड वक्तव्यांसाठी ओळखले जाणारे अजितदादा पवार हे कार्यकर्त्यांशी थेट संवाद साधणारे नेते होते. ग्रामीण विकास, शेती, पाणी प्रश्न आणि पायाभूत सुविधा या विषयांवर त्यांचा विशेष भर होता.महाराष्ट्राच्या राजकारणात निर्णायक भूमिका बजावणारे अजितदादा पवार यांचे योगदान सदैव स्मरणात राहील, अशी भावना यावेळी व्यक्त करण्यात आली.
