पिंपरखेड प्रतिनिधी :
शिरूर तालुक्यातील पिंपरखेड येथे बिबट्याने भरदिवसा मेंढ्यांच्या कळपावर हल्ला केला यामध्ये एक मेंढी गंभीर जखमी झाली.या परिसरात बिबट्याची संख्या व वावर मोठ्या प्रमाणात असून भरदिवसा झालेल्या हल्ल्याने मेंढपाळ, शेतकरी भयभीत झाले असून वनविभागाने या परिसरात तत्काळ पिंजरा लावण्याची मागणी पिंपरखेड ग्रामस्थांनी केली आहे.
गुरुवारी ( दि.३ ) दुपारी तीन वाजता पिंपरखेड ( ता.शिरूर ) येथील जुन्नर रस्त्याच्या बाजूला मोकळ्या शेतात संतोष झिटे या मेंढपाळांचा मेंढ्याचा कळप चरत असताना शेजारच्या ऊसात दबा धरून बसलेल्या बिबट्याने कळपावर झडप घालत एका मेंढीवर हल्ला केला.यावेळी मेंढपाळांनी आरडाओरडा करत बिबट्याच्या तावडीतून मेंढीच्या सुटका करण्यासाठी ढेकळाचा मारा केला.त्यामुळे बिबट्याने मेंढीला सोडून तेथून पळ काढला.मेंढीच्या मानेला, पायाला, पोटाला गंभीर जखम झाली आहे. हल्ला करणारा बिबट्या आकाराने खुपच मोठा असल्याचे प्रत्यक्षदर्शींनी सांगितले.
दरम्यान या परिसरात ऊस तोडणी सुरु असताना आढळलेले चार बछडे बिबट्याच्या मादीने बुधवारी रात्री दुसऱ्या ठिकाणी हलवले आहे.बछडे आढळलेल्या परिसरात बिबट्याकडून भरदिवसा मेंढीवर हल्ला झाल्याने त्या बछड्यांच्या मादीनेच हल्ला केल्याची दाट शक्यता नागरिक व्यक्त करत आहेत.बिबट्याने भरदिवसा हल्ला केल्याने मेंढपाळ तसेच शेतात काम करणारे शेतकरी, महिला मजूरांमध्ये भितीचे वातावरण पसरले असून वनविभागाने या घटनांची गांभीर्याने दखल घेण्याची मागणी सरपंच राजेंद्र दाभाडे यांनी केली आहे
